علم اللوع اضخم كتـــــــــاب في الأرض
بس اللي
يغلط فيه يجيـــــــــبــه الأرض
أما
الصراحة فأمرها ســـــــــــــــــاهل
لكن لا
تجلب المال و لا تصون العرض
عجبي !!!
صلاح
جاهين
النهاردة ميعاد الجلسة الثانية للإستماع لشهود الإثبات فى القضية ، كلنا
صحينا من بدرى و كنا أول الموجودين فى المحكمة , و جوانا فضول نعرف يا ترى الشهود
مين , و هيقولوا إيه , و ياترى كل الإتهامات الباطلة دى ممكن حد يخالف ضميرة , و
يتحمل ذنب القسم , و يشهد شهادة زور .
ربنا يستر , حقيقى دايما بيكون جوانا أمل إن الخير ينتصر , و إننا ما نتصدمش
فى البشر و الواقع , ولكن هى دى الحياة , ولازم نخوض كل تجاربها .
من داخل المحكمة
الحاجب : محـــــــــــكــــــــــــمة
القاضى : نادى على الشهود
الشاهدة الأولى " الأستاذة شيرين أحمد "
القاضى : إسمك و سنك و عنوانك و عملك لو بتشتغلى ؟
الشاهدة : " شيرين أحمد عبد الكريم " , السن 35 سنة , سكرتيرة فى
شركة الرحاب العقارية , و ساكنة فى المنطقة الخامسة
القاضى : قولى والله العظيم أقول الحق
الشاهدة : و الله العظيم أقول الحق
القاضى : قولي شهادتك ؟
شيرين : أنا بطبيعتى بقضى فى العمل أوقات كبيرة جداً , تقريباً ليل و نهار , و
كنت محتاجه ترفيه , فقررت حضور السيرك , و فعلا كنت فى الصف الأمامى و فى الجانب
الايمن من الصالة , يعنى قريبة جداً من ستارة دخول نجوم السيرك , و أول شئ لاحظته
هو إنبعاث رائحة دخان بانجو , و طبعاً كدبت نفسى , و لكن أتأكدت من حالة الحيوانات
لأن حركتها كانت بطيئة , و شبه مخدرة , و خصوصاً الإسود و الثعابين العاصرة . و
هنا اتأكدت إن الحيوانات إتخدرت من رائحة البانجو .
القاضى : الدفاع يحب يسأل الشاهدة أى سؤال ؟
الدفاع : " أستاذة شرين "
, حضرتك عرفتى منين أن الرائحة المنبعثة رائحة بانجو ؟
واضح جدا إن السؤال كان مُحرج للشاهدة , و بعد تردد قالت : فى قهوة تحت البيت
بينبعث منها نفس الرائحة , ودايماً السكان
تشتكى منها
الدفاع : و حضرتك بلغتى عن القهوة ؟
الشاهدة : لأ ، بصراحة خفت يؤذونى
الدفاع : حضرتك بتقولى شفتى أثر البانجو على الحيوانات , مش كده ؟
الشاهدة : أيوه الحيوانات كان واضح عليها جدا أثر المخدر
الدفاع : شركة الرحاب هى شركة رجل الأعمال و السياسى المعروف " حسام
بديع " يا ترى حيترشح للإنتخابات السنة دى ؟
النيابة : النيابة تعترض على السؤال ؟
الدفاع : أكتفى بهذه الأسئلة سيادة القاضى
الشاهد الثانى " فهد جاسم خليفة "
القاضى : إسمك و سنك و عنوانك و بتشتغل فين ؟
الشاهد : " فهد جاسم خليفة " , السن 40 عام , رجل أعمال , قطرى
الجنسية , أعيش فى قطر , ولكن من 4 شهور و أنا مقيم بمصر لظروف خاصة
القاضى : قول والله العظيم أقول الحق
الشاهد : و الله العظيم أقول الحق
القاضى : قول شهادتك ؟
الشاهد : أنا حضرت عرض يوم الجمعة من إسبوعين , و كنا بحفل 9 مساء , و كان
معى ولدى مهند ، لاحظت حال الشباب و الأطفال بالسيرج وايد
مهموم , و عيونهم حزينة , و حسيت حالهم بيعيشوا حياة صعبة حيل , و ها العمل
فيه فقرات مُهينة للشباب , لهادا حضرت اليوم لشعورى إن الشباب و الأطفال يحتاجون
حياة أكرم و أحسن , و لكن الفَجْر و الجهل وصلهم لهادا ، ما لقيوا شغل الا بالسيرج
، و الله شباب مصر يستحج حياة وايد أحسن .
أما الحيوانات بيعاملوها بجسوة , ما بتعيش حياتها الطبيعية , و قلت أن كان
هادا حال الشباب الله يكون بعونهم , فأكيد الحيوانات متعذبين لكن مساكين , ما
بينطجوا و لا راح يتكلمون .
القاضى : الدفاع يحب يسأل الشاهد أى سؤال ؟
الدفاع : هل حضرتك تعتقد إننا لو أتحنا لشباب السيرك عمل كريم ما كانوا لجأو
للعمل فى سيرك روما ؟
الشاهد : نعم أكيد
الشاهد الثالث " عمر أحمد
راشد "
القاضى : إسمك و سنك و مهنتك و عنوانك ؟
الشاهد : " عمر أحمد راشد " , السن 30 سنة , مدرس
القاضى : قول والله العظيم أقول الحق
الشاهد : و الله العظيم أقول الحق
القاضى : قول شهادتك ؟
الشاهد : كانت المدرسة عاملة رحلة للسيرك , و كانت حفلة صباحية , و أنا كنت
موجود مع الولاد كأحد فريق الإشراف على الرحلة , و هناك الولاد شافوا فقرات تفسد ذوقهم
و عقولهم .
القاضى : ممكن توضح بالضبط الفقرات , و وجه إعتراضك عليها ؟
الشاهد : كان أولها فقرة الأرجل , و كان بطلها " الكابتن روما " و "
عز الصغير " و طبعاً دى كارثة , إن
طفل يترك دراسته , و يشتغل بهلوان فى السيرك , و الولاد أُعجبوا جداً به , و قالوا
نفسنا نبقى زي " عز ".
الكارثة الثانية , فى فقرة من الفقرات لما الكابتن " مجدى " كان
بيضرب " الكابتن محمد اليمانى " بالقلم , و كأننا بنعلم الأطفال العنف و
القسوة , أما بشكل عام المستوى الفنى متدنى جداً جدا , لدرجة وجود فقرات فنون
شعبية داخل السيرك , بجد شئ مؤسف , و هدم
لكل لقيم و الاعراف و التقاليد .
القاضى : الدفاع يحب يوجه للشاهد أى سؤال ؟
الدفاع : لا يا سيادة الرئيس
القاضى : بعد غد جلسة الإستماع لشهود النفى رفعت الجلسة
و إنتهت الجلسة و أنا جوايا سؤال مهم ، " والله العظيم أقول الحق "
قد إيه قسم عظيم , يا ترى كل واحد كان مُدرك تماماً لمعنى و حرمة القسم , و يا ترى
كان مدرك حجم الجُرم و الإثم لو أقسم كذب ؟ أكيد هما مش مدركين بشاعة و جرم
الشهادة الزور .
بقلم ناني محسن عبد السلام
بقلم ناني محسن عبد السلام
ليست هناك تعليقات:
إرسال تعليق